Dynjandi eða Fjallfoss?
Fjölsóttir staðir fyrir vestan 2.
Umhverfi bæjarins Dynjanda í Arnarfirði er einhver fegursta náttúrusmíð á Íslandi, enda hefur svæðið verið friðlýst sem náttúruvætti og nær sú friðlýsing yfir um 700 hektara af landi jarðarinnar Dynjanda.
Það eru einkum fossarnir í hinni vatnsmiklu á Dynjandi og umgjörð þeirra, sem gera þessa náttúrusmíð ógleymanlega þeim sem þangað leggja leið sína. Stærsti fossinn og tilkomumesti er einhver fegursti foss á landinu.
Til skamms tíma deildu menn hart hér vestra um hvort þessi perla Vestfjarða héti Dynjandi eða Fjallfoss. Skiptust menn í flokka og héldu margir fast með sínu nafni, þó ekki hafi hlotist af meiðingar eða mannvíg líkt og trúlega hefði gerst á Sturlungaöld. Þó enn eimi eftir af því deilumáli, má segja að tíminn hafi skorið úr um þessar nafngiftir. Einnig rannsakaði Kjartan Ólafsson, Nestor vestfirskra fræðimanna, það mál ofan í kjölinn og varð hans áliti ekki áfrýjað.
En hvers vegna ætli Vestfirðingar hyllist til að hafa tvö nöfn og jafnvel fleiri á sumum örnefnum sínum? Er þar nærtækt að nefna til dæmis Álftamýrarheiði og Fossdalsheiði. Tvö nöfn á sama svæði. Það er skemmtilegt rannsóknarefni, sjá greinina - Lagði svo á Álftamýrarheiði með brennivínstunnuna á bakinu.
Hallgrímur Sveinsson.
