Vikuframvinda í Dýrafjarðargöngum

Lengd ganganna í lok viku 20 var 2.307,6 m sem er 43,5 % af heildarlengd ganganna. Framvinda vikunnar var því 100,6 m en alls voru sprengdar 20 færur. 

Aðstæður í göngunum voru mjög góðar. Rautt setlag, sem kom í ljóst í síðustu viku og hefur verið á stafninum, hækkaði hratt upp stafninn og hvarf upp í þekjuna. Lagið sem er á stafninum núna er massíft stórstuðlað ólivín basalt, það er smá blöðruband efst undir karganum en annars heillegt og gott.

Eftir að setlagið hreinsaði sig upp hefur efni úr göngunum verið keyrt á efnislager vestan við verkstæði, en fram að því var efni ekið í vegfyllingar í skeringu neðan við vinnubúðir. Einnig var unnið við að fjarlægja lífrænan jarðveg úr skeringu frá 600 – 500 og var því efni ekið í fláa neðan við Mjólkárvirkjun. 

Á sunnudag voru settir inn 3 mælipunktar til að mæla aflögun, tveir sitt hvoru megin við útskot E og einn um 10 m aftan við stafn. Á sama tíma var unnið á fullu í forskeringum í Dýrafirði og var þar byrjað að sprengja í vikunni.