02.02.2016 - 06:39 | Hallgrímur Sveinsson
Mikil og ánægjuleg framför á heilbrigðissviði
Florence Nighingale.
Nýlega var tilkynnt að framvegis kæmi læknir tvisvar í viku til Þingeyrar frá Ísafirði einn og hálfan tíma í senn. Þetta eru auðvitað ánægjuleg og óvænt tíðindi, en áður komu læknar einu sinni í viku á staðinn. Reiknað er með að læknarnir taki blóðpróf úr mannskapnum þegar þess þarf á mánudögum. Auðvitað er þetta mjög skynsamlegt og þjóðhagslega mjög hagkvæmt þar sem margir þurfa alltaf á þessu að halda öðru hvoru. Það er náttúrlega betra að einn komi til Þingeyrar heldur en 10 -20 manns fari akandi til Ísafjarðar í umræddu skyni.
Ein til tvær hjúkrunarkonur (leyfum okkur að kalla bæði sjúkraliða og hjúkrunarfræðinga því fallega nafni) koma alltaf til Þingeyrar einu sinni til tvisvar í viku. Sú þjónusta fær almannalof hjá þeim sem njóta.
