Mannlífs- og menningarstund með Hljómsveitinni ÆFINGU frá Flateyri og aðdáendum á Eyrarbakka
Hátíðarstund þessi var að Ránargrund á Eyrarbakka fimmtudaginn 16. febrúar 2017 kl. 18 – 21 á heimili Menningarfulltrúa ÆFINGAR hver er Björn Ingi Bjarnason sem færði til myndar það sem gerðist.
Hátíðin hófst með þjóðlegri sviðaveislu þar sem þáttakendur voru Siggi Björns laga- og textahöfundur ÆFINGAR, Guðmundur Ingi Einarsson, varðstjóri á LItla-Hrauni og Björn Ingi Bjarnason. Síðan var haldið áfram í Menningarsellunni að Ránargrund og þá bættist í hópinn Johnny King, tónlistarmaður.
Sagðar voru sögur og veittar viðurkenningar eins og myndirnar sýna berlega; mynddiskur með Sigga Björns og nýjustu bækurnar frá Vestfirska forlaginu að Brekku á Þingeyri.
Guðmundur Ingi sagði frá fyrstu kynnum sínum af kraftmiklum Vestfirðingum þegar hann var á árunum 1980 og 81 á aflaskipinu Helgu Guðmundsdóttur BA 77 frá Patreksfirði. Hann hitti Finnboga Magnússon, skipstjóra á Helgu, í fyrsta sinni á Hótel Borg og fór vel á með þeim. Þar kom að Finnbogi bauð Guðmundi Inga í sjómann og lagði hann skipstjórann sem rak hann á stundinni. Guðmundur Ingi mætti til skips engu að síður og var vel fagnað af Finnboga.
Guðmundur Ingi er mikil aðdándi ÆFINGAR og skömmu eftir að hann fékk nýja diskinn með ÆFINGU fóru hann og eiginkonan í brúðkaupsferð á sólarströnd. Það eina sem hann setti í tösktuna var diskurinn með ÆFINGU. Fari Guðmundur Ingi í ferðalög er ÆFING alltaf með.
Siggi Björns og Johnny King rifjuðu upp sín fyrstu kynni sem voru í verbúðinni Bræðraborg á Flateyri rétt upp úr 1970 þegar Johnny King kom til starfa hjá Hjálmi hf. Við komuna á Flateyri hét hann reyndar Jón Víkingsson en Flateyringar gáfu honum listamannsnafnið Jonny King sem hann er mjög þakklátur Flateyringum fyrir.
Þá var rifjað upp að í fyrsta sinni sem Jonny King kom fram var einmitt á Flateyri. Það var í Samkomuhúsinu á Flateyri á hátíðarsamkomu Lionsmanna en þeir voru þá með umdæmisþing á Flateyri. Jón Gunnar Stefánsson kynnti Johnny King þarna á svið og svo tók Hljómsveitin ÆFING við og lék fyrir dansi fram undir morgun.
Johnny King hlustar mikið á diskinn með ÆFINGU en hann vann diskinn í lottói í velheppnuðu strafsmannateiti hjá Guðmundi Inga skömmu efir að diskurinn kom út.
Það sem hér hefur verið skrifað er smá brot af því sem rifjað var upp þessa mögnuðu kvöldstund.
Hljómsveitina ÆFINGU skipa; Árni Benediktsson - Siggi Björns - Jón Ingiberg Gudmundsson - Ásbjörn Björgvinsson og Halldór Gunnar Pálsson Fjallabróðir. Nú þegar er hafin stefnumótunarvinna vegna 50 ára afmælis ÆFINGAR haustið 2018.
Siggi Björns, Guðmundur Ingi Einarsson og Jón Víkingsson/Johnny King,
- takk fyrir þessa frábæru kvöldstund.
