Það er kraftur í menningunni og sportinu á Þingeyri þessa dagana. Leikdeild íþróttafélagsins Höfrungs æfir nú af fullum krafti leikrit sem er um margt sérstakt. Því hér er um að ræða sannkallað íþróttaleikrit en verkið fjallar um sögu Höfrungs og upphaf íþróttamenningar á Þingeyri. Leikritið nefnist einfaldlega Höfrungur á leiksviði og er höfundur og leikstjóri þess Elfar Logi Hannesson. Alls taka fjórtán leikarar þátt í sýningunni og alveg jafn fjölmennur hópur starfar að tjaldabaki við leikmyndagerð, búninga, ljós og annað sem til þarf til að setja á svið eitt stykki leikrit. Þetta er þriðja leikritið sem Leikdeild Höfrungs setur á svið á jafnmörgum árum og gaman er að geta þess að öll verkin hafa verið samin sérstaklega fyrir félagið. Ekki nóg með það heldur eru öll verkin um sögulega atburði í Dýrafirði. Leikritið Höfrungur á leiksviði verður frumsýnt föstudaginn 4. nóvember í Félagsheimilinu á Þingeyri. Önnur sýning verður sunnudaginn 6. nóvember. Einnig er stefnt að fleiri sýningum í framhaldinu. Miðasala á Höfrung á leiksviði hefst í lok október.

Leikritið Höfrungur á leiksviði er sportlegt og bráðfjörugt leikrit fyrir alla fjölskylduna. Íþróttalíf hefur löngum verið mjög blómlegt á Þingeyri. Fyrstu heimildir um skipulagða íþróttaiðkun í þorpinu er frá árinu 1885 þegar danskur beykir stjórnaði þar íþróttaæfingum. Stuttu síðar var íþróttafélagið Höfrungur stofnað sem hefur starfað allar götur síðan og er meðal elstu starfandi íþróttafélaga á Íslandi í dag. Í þessu óvenjulega og íþróttalega leikriti er fjallað um fyrstu árin í íþróttalífinu á Þingeyri. Margt ber á góma, óvenjuleg æfingahúsnæði, íþróttasýningarferðalög um Vestfirði, innrás kvenna í félagið, barátta fyrir sérstöku baðhúsi og síðast en ekki síst ,,old boys og girls" leikfimi.