Einn góður úr nýju bókinni: - Nóg með grunnskólann
Umræðan um sjálfstæðan háskóla á Vestfjörðum er ekki ný af nálinni og mun standa enn um hríð. Hún hófst eiginlega strax og menntaskóli varð að veruleika á Ísafirði. Um svipað leyti fundu fræðslumálayfirvöld í landinu upp svonefnt samræmt próf grunnskóla. Á því prófi sköruðu Vestfirðingar ekki fram úr öðrum landsfjórðungum, nema síður væri. Ólafur Þ. Jónsson, Óli kommi, skipasmiður og lengi vitavörður á Hornbjargsvita, var staddur í húsi í Hnífsdal á ofanverðri síðustu öld, þegar háskólaumræðuna bar á góma og var mönnum heitt í hamsi að fá ekki sinn háskóla. Ólafur lagði lítt til mála, en sagði síðan upp úr eins manns hljóði:
„Mér fannst nú alltaf, að Vestfirðingar ættu nóg með grunnskólann.“
(Finnb. Hermannsson, 99 vestf. þjóðs.)
