Þorbjörn bóndi á Ósi við hrútakofann. Ljósm.: Stefán Atli Ástvaldsson, Mjólkárvirkjun.

Glæpakvendi afgreitt

Í skammdeginu fyrir nokkrum árum hringdi síminn á Ósi í Mosdal í Arnarfirði hjá Þorbirni Péturssyni bónda. Í símanum var kona nokkur fyrir sunnan, hátt á sjötugsaldri, og bauðst hún til að verða ráðskona á Ósi og talaði líklega um sambúð. Kona þessi er fræg fyrir að hafa svikið og kjaftað milljónatugi út úr eldri mönnum, einkanlega bændum og einbúum.

       Bjössi og Þórunn spjölluðu í símann út og suður í langan tíma, um fjármál, sambúð og ráðskonustörf á Ósi. Þegar Bjössa fór að leiðast ágengni kerlingarinnar spurði hann óvænt:

       Heyrðu? Hvað ertu annars gömul, gæska?

       Sextíu og fimm ára, svarar Þórunn.

       Þá segir Bjössi:

       Þú ert allt of gömul fyrir mig. Þú hefðir getað reynt að tala við mig hefðir þú verið undir þrítugu!

           
     (Vestfirska forlagið: Úr vestfirska sagnaarfinum)