25 milljónir dollara í veltunni fyrst í stað

   Í stuttu máli er hugmynd þessara aðila, sem hefur verið lengi í smíðum, að byggja ofur lúxushús og íbúðir á Þingeyri, í Mýrahreppi og Vestfirsku Ölpunum, þar sem Auðkúluhreppur er enn starfandi. Fyrirhugað er að reisa 10 hús í 1. áfanga á Þingeyri sem einkum eiga að höfða til peningamanna. Síðan verður farið í sveitina, ef allt fer að óskum og uppbygging hafin á jörðum sem nú kallast eyðibýli. Lágmarksverð á fyrstu húsunum verður 250 milljónir ísl. króna, eða 2,5 milljónir $ miðað við núverandi gengi. Verða þau sett í sölu bæði innan lands og utan og munu fagmenn annast þann þátt málsins.

Ofurhús á Wall Street höfð til hliðsjónar

   Opinber samkeppni um útlit og fyrirkomulag á Þingeyrarlúxusinum mun fara fram undir eftirliti Arkitektafélags Íslands. Er reiknað með að model hús og íbúðir á Wall Street í New York verði höfð til viðmiðunar hvað gæði  og fyrirkomulag snertir. Húsgögn af fínustu sort munu fylgja með fyrir þá sem þess óska. Þá er reiknað með að allt að 1o bílastæði fylgi hverri húseign og fjórir bílskúrar.

   Tekið skal fram, að ekki er reiknað með sundlaugum við nýju húsin á Þingeyri, enda er fínasta sundlaug á staðnum. Aftur á móti er búist við að sundlaugar verði við öll hús sem byggð verða í Auðkúluhreppi í Arnarfirði. Það fer þó eftir því hvort vatnið í Dýrafjarðargöngum verði um eða yfir 50 gráðum á Celsíus þegar upp verður staðið, en það er 18,7 gráður í dag. Til gamans skal þess getið, að heita laugin á Dynjanda var 27,3 gráður síðast þegar mælt var. Bæði göngin og heita laugin eru einmitt á sprungubeltinu sem endar á Laugum í Súgandafirði. Grenndarkynning og umhverfismat munu fara fram við fyrstu hentugleika. Alþjóðlegir fjárfestingamarkaðir og Vogunarsjóðir verða fjárhagslegir bakhjarlar hinna miklu framkvæmda fyrir vestan.

Framkvæmdaaðilar

   Loks skal það upplýst, að framkvæmdaaðilar þessa nýstárlega byggðaverkefnis hér vestra, sem á líklega fáa sína líka á Íslandi, eru eftirtaldir aðilar:

   Byggingaþjónusta Sigmundar F. Þórðarsonar ohf á Þingeyri. Sími 863-4235. Sigmundur lærði iðn sína sem kunnugt er hjá Gunnari Sigurðssyni, meistara og arkitekt í Hlíð. Í því sambandi skal þess getið, að þeir félagar reistu á sínum tíma megnið af þeim húsum sem byggð voru í Dýrafirði á 20. öld. Þannig að reynsla og metnaður er fyrir hendi.

   Ungmennafélagið Gísli Súrsson og Kvenfélagið Hugrún í Haukadal, sem var fyrsta kvenfélagið á Vestfjörðum. Forsvarsmaður þeirra félaga er Guðberg Kristján Gunnarsson, sauðfjárbóndi og smali í Miðbæ þar í dalnum. Sími 899-8298.

   Vestfirska forlagið. Hallgrímur Sveinsson, léttadrengur forlagsins, mun sjá um kynningarmál, upplestra og samskipti við erlenda aðila. Sími 892-8260. Er hugmyndin að gefa út hvítbók um byggðaverkefnið á vegum hins nafnkunna forlags og verður hún á íslensku, ensku, þýsku, frönsku, kanadísku, færeysku og japönsku.

   Sagt er að nú þegar hafi borist margar fyrirspurnir frá ýmsum milljónamæringum og fjámálaspekingum um Þingeyrarlúxusinn. Enda hefur kynning farið fram á bak við tjöldin sumsstaðar erlendis, til dæmis á Jómfrúreyjum. En hér gildir það fornkveðna: Fyrstir koma, fyrstir fá!

   Fyrirhugað er að halda opinn kynningarfund um málið í Blábankanum á Þingeyri í dag, 1. apríl kl. 14,00. Þar ku verða léttar veitingar í boði.