Vitleysan ríður ekki við einteyming
„Það er fyrirmunun að fleygja mat og vanþakklæti við gjöfula jörð.“ Svo var sagt í gamla daga við ungdóminn. Við höfum nú kallað til þrjú vitni hér á Þingeyrarvefnum um hvernig það var að vanta mat. Vera svangur. Og það er ekki svo langt síðan þetta var hlutskipti fjölda landsmanna. Það er staðreynd.
Í dag er uppi annar óður. Við förum í stórmarkaðina og kaupum helmingi meira af mat en við höfum gott af og þörf fyrir. Borgum með greiðslukortum sem bankarnir og svokölluð greiðslukortafyrirtæki hirða svo milljarða króna skatt af til að þeir ríku geti orðið enn ríkari! Svo hendum við umræddum helming í ruslið. Og auðvitað þurfa menn að læra að flokka, flokka og flokka þetta og annað svokallað sorp. Alveg undir drep. Ef þetta er ekki bilun og hrein vitfyrring er vandséð hvað þau orð annars tákna.
