Vestfirska vísnahornið - "Höldum áfengi til Haga“
Áfengisfrumvarpið er farið að vekja hörð viðbrögð í þjóðfélaginu.
Má þar nefna Landlæknisembættið og hina eitilhörðu Akademíu á Þingeyri.
Indriði Aðalsteinsson, bóndi á Skjaldfönn lætur sitt ekki eftir liggja í orðsendingu til blaðsins Vestfirðir:
Það er ekki einleikið hvað áfengisauðvaldið getur dregið unga og einfalda dreifbýlisþingmenn á asnaeyrunum.
Í fyrra Vilhjálm Árnason, Skagfirðing og nú Teit Björn Einarsson, Önfirðing.
Ættargöfgi hrakar hér.
Hægt er það að sanna.
Teitur Einars fremstur fer
í flaumi drykkjumanna.
Aldrei féll þó faðirinn
í for svo lágt.
Ósköp hlýtur ættlerinn
að eiga bágt.
Georg Jón Jónsson, bóndi á Kjörseyri í Hrútafirði bendir á annað sjónarhorn og svo stuðning Haga við málið:
Það tókst vel hjá ungliðum á Alþingi með brennivínsfrumvarpið. Það yfirtók alla umræðu um leiðinleg mál, eins og skýrslur sem búið er aðsitja svo lengi á að það er komin vond lykt af þeim, sjómannaverkfall hvarf í skuggann í bili, vandi heilbrigðiskerfisins og fleira var minna rætt en sú þjóðarnauðsyn að koma vín og bjór í matvöruverslanir.
Forstjóri Haga lofaði þetta framtak strax.
Finnur Árnason fagnaði.
Ef frumvarpið yrði að lögum
loks yrði gert það sem gagnaði
gróða og vexti í Högum.
Snillingurinn Þórarinn Eldjárn samdi máltæki fyrir Alþingi sem hljóð- ar svo „Höldum áfengi til Haga"
Blaðið Vestfirðir 23. febrúar 2017.
