Myndin var tekin í nóvember 2012 er Hallgrímur Sveinsson, forleggjari, afhenti síra Baldri fyrsta eintak bókarinnar í Vatnsfjarðarstofu að viðstöddum nokkrum áhugamönnum. Í baksýn er frú Ólafía Salvarsdóttir, eiginkona síra Baldurs, en þá var hann kominn að fótum fram og var við rúm. Ljósm Ómar Smári Kristinsson.

Haustið 2012 kom út hjá Vestfirska forlaginu bókin Vatnsfjörður í Ísafirði, þættir úr sögu höfuðbóls og kirkjustaðar eftir Guðrúnu Ásu Grímsdóttur.

Í bókinni er rakin saga Vatnsfjarðar frá upphafi norrænnar mannabyggðar fram undir lok 20. aldar. Þar sátu misvitrir höfðingjar á miðöldum og lærdómsmenn í prestastétt á seinni öldum. Er hún byggð á prentuðum sem óprentuðum heimildum og tekið mið af fornleifarannsóknum sem fram fóu á staðnum í mörg ár.

Frumkvæði að bókinni átti síra Baldur Vilhelmsson, en hann sat síðastur presta í Vatnsfirði. Ritstjóri verksins var Torfi H. Tulinius prófessor, en í ritnefnd með honum voru þeir síra Baldur Vilhelmsson og Már Jónsson prófessor.