Lýðháskólinn á Flateyri hefur verið í undirbúningi af fagfólki undanfarin 2 ár og er ætlað að fylla tómarúm í íslensku menntakerfi. Skólinn hleypir af stokkunum tveimur námsbrautum í haust, en skólinn hefur formlega göngu sína í september 2018. Náttúran, sjálfsbjargarviðleitni, sköpun, hugmyndavinna og nemandinn sjálfur eru viðfangsefni námsbrautanna og ættu að eiga erindi við fjölmarga. Helena Skaptason Jónsdóttir hefur verið ráðin skólastjóri skólans en hún er menntuð sálfræðingur og hefur síðustu tvö ár starfað með Læknum án landamæra. 

Opnað hefur verið fyrir umsóknir í skólann en skólagjöld við skólann eru 200 þúsund krónur fyrir hvora önn. Innifalið í skólagjöldum er morgun- og hádegismatur alla virka skóladaga, námsefni og ferðir, og verkefni sem tengjast vinnu og verkefnum við skólann. Tvö sveitarfélög á vestfjörðum hafa boðið nemendum námsstyrk. Ísafjarðarbær styrkir tvo nemendur til náms og Bolungarvíkurkaupstaður styrkir einn nemanda til náms skólaárið 2018-2019. Hægt er að nálgast frekari upplýsingar um styrkina hér á vefsíðum sveitarfélaganna: Ísafjarðarbær, Bolungarvíkurkaupstaður. 

Frekari upplýsingar um skólann og námið má finna á vefsíðu skólans.