Vortónleikar tónlistarnema á Þingeyri fóru fram í félagsheimili þorpsins á þriðjudag. Á tónleikunum komu fram 20 tónlistarnemar og léku á píanó, hljómborð, harmóníku, fiðlu, gítar, bassa og trommur auk þess sem sönghópur kom fram. Nemendurnir voru á ýmsum aldri, allt frá grunnskóla og fram á sjötugsaldur enda þekkir tónlistin engin aldurstakmörk. Í lok tónleikanna léku allir nemendurnir saman lagið Maístjarnan og síðan sungu allir saman, áheyrendur og flytjendur, sumarlagið nú er sumar. Félagsheimilið var þétt setið áhugasömum og ánægðum áheyrendum. Tónlistarkennararnir Raivo og Krista Sildoja höfðu veg og vanda af öllum undirbúningi hinnar metnaðarfullu dagskrár. Þau hafa nú fengið ársleyfi frá störfum og munu dvelja í Eistlandi næsta vetur.