Heita laugin á Dynjanda sem fáir vita um. Laugarhitinn er um 27 gráður á C. Þær eru margar perlurnar bara á Vestfjörðum! Ljósm.: H. S.

Tillögur okkar hér fyrir vestan og margra fleiri um að láta erlenda ferðamenn greiða aðgangseyri að Náttúrulistasalnum Íslandi verða sífellt umhugsunarverðari. Með hverjum deginum sem líður. Fimm þúsund krónur á hvern fullorðinn ferðamann í komugjald til landsins er algjört lágmark. Í hvað skal nota þá fjármuni? Jú, til að greiða fyrir alls konar nauðsynlega þjónustu við ferðamanninn. Og til að forða því að landið fari í svað fyrir stjórnleysi.

Ferðamaðurinn sjálfur skilur þetta miklu betur en við, sbr. skoðanakannanir. Og hlær að okkur.

   Ísland er stórasta land í heimi. Þeir sem kunna að græða selja gistingu yfir eina nótt á 100 þúsund kall. Oft meira að sögn. Leigja inniskó sem kosta 600 kr. í innkaupum á 1,500 kr. í nokkra klukkutíma. Og harðfiskkílóið selja sumir á 26,000 kr. Og landinu blæðir því það má ekki leggja á smá komugjald. Sem flugfélögin geta innheimt eins og að drekka vatn. Það vilja þau náttúrlega ekki gera ótilneydd. Þau eiga bara að græða á ferðamanninum.