Arnfinnur Jónsson er margfaldur Íslandsmeistari í skotfimi. Á hann ekki langt að sækja það. Þetta er að vísu ekki Gamla Löng, hin fræga byssa sem faðir hans átti, sem hann fer höndum um á myndinni. En hún er nú á heiðursstað uppi á vegg hjá Sigurði bróður hans á Þingeyri.

Arnfinnur Jónsson, refaskytta, sonur Jóns Þorsteins Sigurðssonar heitins, gamla Rebba á Þingeyri, er búinn að koma tvisvar til tófu-og minkaveiða í Arnarfirði með dóttur sinni á þessum vordögum. Á svæðinu frá Langanesi að Stapadal eru þau búin að fá 20 hlaupatófur, þar af 9 hvolpafullar læður og 5 minka. Guðjón Strandamaður er svo búinn að fá 6 minka á Tjaldanesi utan Auðkúlu.

    Arnfinnur segir að ekki sjái högg á vatni þrátt fyrir alla þessa veiði. Þau hafi séð dýr út um allt.  Svona er þetta bara.