Ímyndunaraflið ræður við sandkastalagerð
Sandkastalakeppnin í Holti fer fram í dag, laugardaginn 39. júlí 2016, við Holtsbryggju í Önundarfirði í tuttugasta sinn. Einstakur sandur og góð skilyrði gera ströndina að tilvöldum stað fyrir slíka keppni. Séra Fjölnir Ásbjörnsson sóknarprestur í Holti, sem heldur utan um keppnina, á von á 200 manns.
Í dag verður haldin Sandkastalakeppni í Holti í tuttugasta sinn. Keppnin fer fram í kringum Holtsbryggju í Önundarfirði á Vestfjörðum. Séra Fjölnir Ásbjörnsson hefur séð um keppnina seinustu ár og hann segir að það megi búast við fleiri hundruð manns.
„Fyrir tveimur árum var algjör met- þátttaka hjá okkur enda var veðrið algjörlega frábært. Í fyrra var hún ekki jafn góð enda ekki besta veðrið. Spáin fyrir helgina lítur þó vel út þrátt fyrir að það sé aldrei hægt að taka alveg mark á henni.“
Á seinustu árum hafa verið byggðir yfir hundrað kastalar ár hvert en það eru margir sem koma að hverjum og einum kastala. „Það er engin skráning heldur mætir fólk bara. Keppnin byrjar á slaginu eitt og keppendur hafa níutíu mínútur til þess að klára. Þegar fólk er byrjað að vinna í verkunum sínum þá númerum við hvern kastala og dómnefndin labbar á milli. Svo eru sigurvegararnir krýndir í kringum klukkan þrjú.“
Sandverkin sem keppendurnir byggja eru eins mismunandi og þau eru mörg en það eru engar reglur varðandi það hvað má byggja.
„Í gegnum tíðina höfum við séð alls konar skrímsli, skjaldbökur, eldgos, Ísland, stóla, fólk. Það eru engin takmörk fyrir því sem fólki dettur í hug.“
Margir mæta alltaf aftur á hverju ári enda hefur fólk ár til þess að hugsa nýjar hugmyndir á milli keppna.
„Ég hugsa að þetta sé eina sandkastalakeppnin á landinu, maður hefur allavega ekki heyrt af neinni annarri. Það eru auðvitað einstaklega góð skilyrði til þessarar iðkunar í Holti. Þar er góður hvítur sandur, stutt í sjóinn og fleira sem gerir manni kleift að byggja sandkastala.“
„Þegar veðrið er gott skella sumir sér í sundsprett í sjónum á meðan aðrir taka þátt í keppninni. „Þetta er svona ákveðin baðstrandarstemning sem er þarna en það getur verið erfitt að finna hana annars staðar á landinu. Börnin eru sérstaklega spennt fyrir þessu en fullorðna fólkið tekur líka a virkan þátt.“
