Hrós dagsins: - Umsjónarmenn Skrúðs í Dýrafirði fá hrós dagsins
Hrós dagsins fá þau Kristín Álfheiður og Sighvatur Jón á Höfða í Dýrafirði. Og fyrir hvað? Jú, fyrir frábæra umönnun og natni við garðinn Skrúð á Núpi, sem aðrir skrúðgarðar á Íslandi eru kenndir við. Þau eru nefnilega starfsmenn garðsins, svokallaðir Skrúðsbændur, í verktöku. Þau sjá um að yrkja garðinn og halda honum sómasamlegum og til prýðis fyrir gesti og gangandi.
Að sögn Sæmundar Þorvaldssonar telst Ísafjarðarbær eigandi garðsins frá 1996. Er hann rekinn á vegum bæjarins. Í gegnum tíðina hafa að sjálfsögðu margir komið við sögu sem Skrúðsbændur þó þeir verði ekki nafngreindir hér.
En heiður þeim sem heiður ber!
Séra Sigtryggur Guðlaugsson (1862-1959) prófastur og skólastjóri á Núpi, ræktaði garðinn Skrúð í skjólsælum hvammi um 1 km austan við bæinn Núp í Dýrafirði. Upphafsár framkvæmda við Skrúð er árið 1905 en formlegur vígsludagur er 7. ágúst 1909. 100 ára afmælis garðsins var minnst með hátíð í garðinum 8. ágúst 2009.
Í Skrúð koma þúsundir gesta á hverju sumri. Margt forvitnilegt er að sjá í garðinum. Þar er minnisvarði um þau hjónin séra Sigtrygg og Hjaltlínu Guðjónsdóttur á Núpi. Einstök staðsetning Skrúðs, í náttúru snarbrattra fjallshlíða Dýrafjarðar, kemur einnig mörgum á óvart. Það var líka ætlun stofnandans á sínum tíma að sýna hvað hægt væri að rækta í hrjóstrugum jarðvegi við þessar aðstæður.
