09.07.2015 - 07:09 | BIB,skutull.is
Hlaupahátíð á Vestfjörðum um aðra helgi
M.a. verður farið um Svalvogahringinn í Dýrafirði og Arnarfirði.
Hátíðin hefst með keppni í sjósundi og Arnarneshlaupi. Sjósundið fer fram við aðstöðu Siglingaklúbbsins Sæfara í Neðstakaupstað á Ísafirði. Keppt verður í 500 og 1.500 metra sjósundi.
Á hlaupatíðinni hefur hingað til verið hlaupið um Óshlíð frá Bolungarvík, en vegna þess hve hrunið hefur úr veginum um Óshlíðina hefur í staðinn verið tekin upp ný hlaupaleið frá frá Súðavík og út á Ísafjörð, svokallað Arnarneshlaup.
Laugardaginn 18. júlí verður hjólreiðakeppnin, 55 kílómetra leið um Svalvogahringinn í Dýrafirði og Arnarfirði. Sama dag verður keppt í skemmtiskokki og skemmtihjólreiðum á Þingeyri.
Hlaupahátíðinni á Vestfjörðum lýkur á sunnudeginum með Vesturgötuhlaupinu, en þá er hlaupið frá Þingeyri 10, 24 og 45 kílómetra hlaup.
Um 300 manns hafa tekið þátt í Hlaupahátíð á Vestfjörðum síðustu ár og má búast við að það verði ekki færri þetta árið.
Hægt er að skrá sig til leiks hér á heimasíðu Hlaupahátíðarinnar.
