Hjólabókin um Árnessýslu komin út
Hjólabækurnar að vestan eiga sér enga hliðstæðu hér á landi:
Fjórða Hjólabókin eftir Ómar Smára Kristinsson er komin út hjá Vestfirska forlaginu. Fjallar hún um Árnessýslu. Í mestu ferðamannasýslu landsins er fjöldinn allur af spennandi leiðum fyrir hjólreiðafólk. Hér er lýst tólf hjólreiðaleiðum, auðveldum og erfiðum, sem eiga það sameiginlegt að þær liggja í hring og að hægt er að loka hringnum á einum degi.
Hverri leiðarlýsingu fylgja tillögur að fleiri ferðum. Auk þess er fjallað um átta léttar hringleiðir sem ekki teljast til dagleiða. Einnig er í bókinni að finna kort af almenningssamgöngum og umferðarþunga. Helstu hagnýtu upplýsingar um hverja leið eru útlistaðar í máli og á kortum. Allar leiðirnar eru teiknaðar með litaskala sem útskýrir hve brattinn er mikill. Slík útfærsla hefur ekki verið notuð fyrr. Rúmlega 200 ljósmyndir gefa innsýn í sýsluna, hvernig þar er umhorfs og hverskonar vegir og stígar bíða lesenda.
Fyrri Hjólabækurnar fjölluðu um Vestfirði, Vesturland og Suðvesturland. Ljóst er að Hjólabækurnar að vestan eiga sér enga hliðstæðu hér á landi.
Góða ferð
Ómar Smári Kristinsson
Vestfirska forlagið
