Neytendafrömuðurinn Dr. Gunni fjallar á skemmtilegan hátt um Vestfirði í færslu á bloggsíðu sinni, en hann eyddi sumarfríi sínu m.a. á Ísafirði. „Sumarfríið var auðvitað allt saman undursamlegt. Til dæmis Gamla bakaríið á Ísafirði. Þar var eigandinn, hin 89 ára gamla Rut, í góðu stuði og gaf mér Napóleonsköku. Þetta er uppáhaldsbakkelsi Ólafs Ragnars Grímssonar og hann kaupir alltaf Napóleonskökur og lætur stundum senda sér í pósti þegar mikið stendur til á Bessastöðum. Þú getur ekki verið minni maður, sagði sú gamla og ég var hjartanlega sammála", segir í færslunni. Hann segir að hann hafi farið í göngur víða um svæðið. Þá hrósar hann nýopnuðu kaffihúsi á Þingeyri og matsölustað í Súðavík. „Í elsta húsi bæjarins eru nokkrir Belgar búnir að opna kaffihús sem þeir kalla Simbahöllina. Belgarnir fengu húsið nánast gefið og hafa nú gert það allt upp. Þarna fæst eðalkaffi og belgískustu vöfflur á Íslandi. Mjög góðar og alveg möst að tékka á þessu ef fólk er á svæðinu. Dænerinn Amma Habbý á Súðavík er snilld sem fyrr. Þú hefur ekki lifað fyrr en þú hefur torgað einum sjeik og borgara þar."

Dr. Gunni segir þó veðrið mátt hafa verið betra þar sem heilu dagarnir hafi farið í vætu og vosbúð. „Gott samt fyrir Mýrarboltann. Ég glápti smá á það, aðallega kvennaleiki." Hann mælir einnig með ferðaþjónustunni Heydal í Mjóafirði og sundlauginni í Reykjanesi. „Það er stundum kvartað yfir veitingasölu á landsbyggðinni, aðallega N1-væðingunni á hringvegi 1. Maður verður að vita hvar á að stoppa. Ég get t.d. mælt heilshugar með Heydal í Mjóafirði. Það er svaka fínt bistró með fullt af spennandi stöffi á matseðlinum þó ég hafi nú bara fengið mér hamborgara (var þarna í hádeginu). Kobbi páfagaukur röflaði nonstopp yfir hausamótunum á manni. Sundlaugin á Reykjanesi er líka gríðarlega töff og heit og alveg möst að tékka á henni."

Bloggfærslu dr. Gunna má lesa í heild á vef hans: http://eyjan.is/goto/drgunni/