Jón Sigurðsson (1811 - 1879).

Nú er 17. júní liðinn í aldanna skaut rétt einu sinni. Lýðveldisdagurinn eða þjóðhátíðardagurinn sem almennt er kallaður í dag. Og afmælisdagur Jóns Sigurðssonar.

Flestir eru sammála um að maður dagsins á öllum 17. júni dögum sé þessi Vestfirðingur, Jón forseti.

Bent hefur verið á að helstu fjölmiðlar landsins hafi ekki gert því nokkur skil á nýliðnum 17. júní hvað manna hann var. Eða fyrir hvað hann stendur í þjóðarsögunni. Að vísu nefna sumir nafn hans í framhjáhlaupi. Síðan ekki söguna meir.

Að vísu liggur ekki fyrir nein fagleg könnun í umræddu efni svo vitað sé. Hér verður að sjálfsögðu ekkert fullyrt um þetta. En vonandi eru einhverjir alvöru fjölmiðlar dagsins að rækja skyldu sína og svara spurningunni hver Jón forseti var. Ef ekki þá er það miður. Allra hluta vegna.

Í þessu efni verður ekki undan því vikist að nefna, að hinn hógværi og lítilláti Þingeyrarvefur, rekinn af skálfboðaliðum, virðist hér vera undantekningin. Þar hefur þessum uppáhaldsmanni þjóðarinnar verið gerð rækileg skil árið út og árið inn í langan tíma. Og saga hans tíunduð frá ýmsum sjónarhornum.

Þetta vita margir, en mættu vera fleiri.