Ferðamenn farið heim, flóttamenn velkomnir! Ljósm. af ruv.is

Spyrja má hvort það sé draumur Vestfirðingsins að sjá ekkert nema ferðamenn allan ársins hring. Vilja menn að Vestfirðir verði Mallorca norðursins? Leggja niður alla frumatvinnuvegi og snúa sér að því að vera bugtandi ferðaþjónar? Vera má að sumir telji það eftirsóknarvert. Ferðamennska upp að vissu marki er trúlega af hinu góða. En eftirfarandi frétt á ruv.is er mikið umhugsunarefni:

„Gríðarleg fjölgun ferðamanna á Miðjarðarhafseynni Mallorca veldur íbúunum áhyggjum. Aukin hætta á hryðjuverkum í Norður-Afríku og Tyrklandi hefur orðið til þess að ferðamönnum á Mallorca hefur fjölgað um milljón frá því í fyrra, þegar 8,8 milljónir ferðamanna komu til eyjarinnar.

Ferðamönnum á Mallorca hefur fjölgað um 70 prósent frá árinu 2010 og hætta er nú talin á að milljónir ferðamanna eyðileggi menningu og hefðbundið líf íbúanna á eynni. 

Slagorð sjást nú máluð á veggi í Palma, höfuðborg Mallorca, þar sem stendur: „Túristar farið heim".

Íbúum Mallorca ofbýður fjölgun ferðamanna á eynni, sem búist er við að verði fleiri en 10 milljónir á þessu ári. Íbúum finnst að sér þrengt og kvarta undan því að ferðamenn þrýsti upp íbúðarverð, geri það að næstum er ómögulegt að finna bílastæði og eyðileggi hefðbundið bæjarlíf íbúanna í Palma og á öðrum stöðum.

Helmingur af tekjum íbúanna kemur frá ferðamönnum. Talsmaður íbúasamtaka í Palma segir að verið sé gera borgina að sálarlausum skemmtigarði fyrir túrista og auðugir útlendingar hækki fasteignaverð upp úr öllu valdi.

Í hefðbundnum sjávarplássum er nú íbúðarverð svo hátt að eyjaskeggjar hafa ekki efni á að kaupa sér þak yfir höfuðið. Samkvæmt upplýsingum þýskrar fasteignasölu þá kaupa útlendingar 40 af hundraði allra íbúða og húsnæðis sem selt er á Mallorka.“