02.09.2015 - 06:30 | Hallgrímur Sveinsson
Menn koma í stríðum straumum að smakka belgísku vöfflurnar!
Wouter van Hoeymissen er mikill spekingur og gaman við hann að tala um ýmsa hluti. Hér hallar hann sér upp að veggnum í skrifstofu Sigmundar kaupmanns. Ljósm.: H. S.
Það hefur verið mikið um að vera í Sigmundarbúð eða Simbahöll í sumar.
Menn koma í stríðum straumum að smakka belgísku vöfflurnar hjá þeim Wouter og Janne Kristensen. Ljóst er að þær eru einsdæmi hér á landi og þó víðar væri leitað. Við báðum kallinn um að láta okkur hafa uppskriftina að vöfflunum.
En það kom auðvitað ekki til greina, enda hernaðarleyndarmál, Top secret!
Wouter segir að hestamennskan hafi einnig blómstrað á þessu sumri. Svo leigðu margir hjá þeim fjallahjól. Sumir hjóluðu að vitanum í Svalvogum, en lögðu ekki í að fara allan hringinn um Vestfirsku Alpana.
Svo er það allsstaðar sama sagan: Gestir eru örugglega um ¾ erlendir ferðamenn hjá þeim. Wouter reiknar með að sumarstarfinu ljúki í kringum 10. september.
