Guðfinna Sigríður Sigurðardóttir.

Foreldrar hennar voru hjónin Björnfríður Ólafía Magnúsdóttir, f. 14.12. 1926, d. 11.5. 2006, og Sigurður Friðfinnson, f. 26.3. 1916, d. 19.2. 2002. Hún var þriðja barn foreldra sinna en þau eignuðust 17 börn.

Þann 31. desember 1969 giftist Guðfinna Samúel Jóni Guðmundssyni frá Grænhól á Barðaströnd.

Börn þeirra þeirra eru 1. Sædís Hrönn, f. 15.9. 1970, börn hennar: Aron Elvar, Alexandra Ýrr, drengur andvana fæddur og Ísabella Von. 2. Særún Magnea, f. 12.5. 1972, börn hennar: Jökull Máni, Búi og Karin. 3. Hafþór Ingi, f. 10.8. 1974, börn hans: Ásdís Helga, Daníel Smári, Róbert Ingi og Andri Snær. 4. Hafliði Guðmann, f. 20.11. 1985. Hafliði og Aron hafa búið hjá þeim hjónum síðustu árin og hafa verið þeim mikil stoð og stytta.

Guðfinna gekk í farskóla á Ketilseyri frá ca.7 ára aldri til fermingar og fór svo í Húsmæðraskólann á Staðarfelli veturinn 1965-1966. Hún fór ung að leggja móður sinni lið við heimilisstörfin og upp úr fermingu fór hún að vinna utan heimilis og vann meðal annars á Héraðsskólunum á Núpi og í Reykjanesi sem og á Sjúkraskýlinu á Þingeyri. Guðfinna flytur með eiginmanni sínum til Reykjavíkur 1971 og frá 1974 voru þau til heimilis að Framnesvegi 48 þar sem þau bjuggu næstu 30 árin. Hún var að mestu heimavinnandi á meðan börnin voru ung en er þau uxu úr grasi sinnti hún ýmsum umönnunarstörfum og varð það hennar helsti starfsvettvangur. Guðfinnu var margt til lista lagt. Hún var mikil og góð saumakona, mjög nýtin og saumaði bæði úr nýjum efnum sem og notuðum flíkum og bjó oftast til sín eigin snið. Einnig prjónaði hún og heklaði bæði flíkur og annað. Hún hafði gaman af allri matseld og undi sér vel í eldhúsinu. Síðustu árin málaði hún mikið og eftir hana liggja ófá falleg málverk.

Útför Guðfinnu fór fram frá Guðríðarkirkju í dag, fimmtudaginn 21. maí 2015.

Morgunblaðið fimmtudagurinn 21. maí 2015